و بعدين؟؟
و بعديـــن؟؟
و بعديـــــــــن؟؟؟
معلش اليوم بدي أكسر القاعدة
و أكتب بالعامية
و خلي سيبويه يطلع لي من قبره و يحاسبني اذا بدو.
يعني
صارالواحد اذا فكر مجرد تفكير بالكتابة,
أو اذا أخد لفة بين المدونات...
أو على مواقع الاخبار عالنت
أو محطات الاخبار بالتلفزيون,
أو حتى يحكي مع حدا عالتليفون...
صار شي بيجيب الاكتئاب.
بقى حبيت فش خلقي,
و أضرب شي ...
أي شي...
لك حتى عرض الحائط ما في مشكلة ,
المهم أضرب و خلص.
بس ما لقيت شي أضربه
غير القواعد اللي حطيتها لما بلشت التدوين,
و هالمقال أكبر دليل على تردي الحالة المعنوية وين ما كان.
بقى ما رح اكتب بالفصحى
و لا رح اكتب شي جد .
ومتل العادة كل فترة بحلف يمين أنو ما رح اسمع أخبار, و كتير أشيا بقول بدي قاطعها , بس يومين و بيرجع كل شي متل ما كان.
بقى استناداً على ما قد سبق, هالمقال مؤقت , يعني رح احذفه بس يرجع لي عقلي, و هو دعوة للجميع بأن ياخدوا نفس, و ما يحملوا الدنيي أكتر من اللازم.
على فكرة
اللي بيحب يدلي بدلوه و يكتب له شي نكتة
بيكون كتر خيره
و له الاجر و الثواب مع كل ضحكة بيضحكها المدون المكتئب
و نكتة قصيرة تمنع بلاوي كتيرة
و نكتة يا محسنين
و لنبدأ على بركة الله بأول نكتة:
قال الحمصي نحنا ... إدفن
***
مرة واحد من كتر ما خسر بالبورصه مرض
راح لعند الدكتور قام قله الدكتور : يا الهي ضغطك وصل 70
قله المريض : بيع بيع بيع
***
موظف التعداد السكني شاف محشش قاعد قدام بيته سأله :
إنت من أهل البيت ؟
قله : لأ أنا من كفار قريش
***
حمصي راح بدو يعمل عملية فدائية باسرائيل , طعن حالو بالسكين فمات أربعة من الضحك
***
حمصي عم يصيح بالمشفى قالوله خير سلامات؟؟
قلهم : مافي شي
بس الوالد شوي متوفي
***
واحد فلسطيني راح عالحج شاف الناس
عم ترجم قام جاب دولاب سيارة وشعلوه
***
سودانية عم تقطع الشارع
شافها حشاش صار يغني: وعدا الليل على مهلو
***
حمصي رشح حالو للانتخابات
كتب لافتة: عسى أن تكرهوا شيئاً وهو خيرٌ لكم
***
دلوع راح يشتري حليب
فات عند سوبرماركت قال للبائع
عمو : عندك عصير بقر ؟؟؟؟
***
بخيل راح يزور أبوه بالمشفى .. لما وصل ع الباب شاف كلمة
" ادفع"
قال : نجي بعدين نزوره
***
واحد اجاه صبي بعد سبع بنات سماه .. بدري
***
حشاش ماشي بالشارع مسكتو دورية الشرطة قالولو اطلاع معنا
قال لهم
معلش والله البيت قريب
***
حمصي سمى ابنه على اسم أبوه... بابا
***
مع احترامي لكل الجنسيات و الانتماءات
و القومية العربية على راسي من فووووووووووق
ملاحظة: يمنع كتابة النكت البايخة و الطووووووووويلة
مالي ناقصة
انا غشاش هي 3 مو وحدة
قال في حماصنة عم يعملوا مظاهرة ضد أمريكا. قام لبسوا واحد صورة بوش وحرقوه.
قال في حماصنة عم يلعبوا ( الغميضة) مع بعضهم ... قام ضاعوااااا
في واحد حمصي هديتو حبيبتو ببغاء.. و شافتو حبيبتو بعد يومين و قالتلوا حبيبي كيف الببغاء ..قلا: طعمو متل الفروج.